Bat'umi eða Batumi er hafnarborg nærri landamærum Tyrklands við Svartahaf í Suðvestur-Georgíu.  Hún annast olíuútflutning frá Baku í Azerbaijdzhan, þaðan sem olían kemur um stóra leiðslu.  Þarna eru stórar olíuhreinsunarstöðvar, skipasmíðastöðvar, matvælaframleiðsla o.fl.  Jaðartrópískt loftslag, góðar baðstrendur og fallegt landslag laðar til sín fjölda ferðamanna.  Í fornöld var þarna grísk byggð.  Ottómanatyrkir réðu borginni frá 16. öld til 1878, þegar Rússar fengu hana eftir Rússnesk-tyrkneska stríðið.  Áætlaður íbúafjöldi árið 1990 var 137 þúsund.