Prag er á 50°05'N og 14°25'A í stórri lægð við Moldá.  Hún er í u.þ.b. 180 m hæð yfir sjó en uppi á Hvítafjalli nær hún 383 m hæð.  Í hinum sögulega miðhluta borgarinnar, sem er 8,5 km², bjuggu 160 þúsund manns árið 1783.  Á árunum 1883 - 1901 stækkaði borgin um Vysehrad, Holesovice-Bubny og Liben, eða í 21 km², og íbúarnir urðu 216 þúsund.  Stór-Prag varð til árið 1922 (171 km²; 677 þús. íb.), þegar 37 úthverfi sameinuðust henni.  Árið 1978 stækkaði hún enn og varð 497 km² með ca. 1,2 milljónir íbúa.  Borginni er skipt í 10 hluta með sérstjórn.  Í borgarhluta 1 er gamli miðbærinn með Jósefsborg (fyrrum gyðingabænum), Stare Mesto, Nove Mesto, Mala Strana og Hradcany.

Frá lokum síðari heimsstyrjaldarinnar hafa íbúar borgainnar verið næstum eingöngu Tékkar.  Þýzkumælandi íbúum hefur fækkað stöðugt frá upphafi 19. aldar og eru nú færri en 5% borgarbúa.

Flestir Tékkar, og þar með íbúar Prag, eru rómversk-katólskir en næstir í röðinni koma hússítar.

Moldárhöfnin við Holesovice er mikilvæg fyrir alls konar vöruflutninga á ánni og viðskipti almennt.  Áin er ekki skipgeng ofan við borgina.  Viðkomustaður farþegaskipa er í Engelsbryggju (Nabrezi B. Engelse) í grennd við Palackýbrú.

Ruzyneflughöfnin, u.þ.b. 20 km norðan borgarmiðjunnar, er nýtízkuleg.  Þaðan og þangað fljúga flugvélar tékkneska flugfélagsins CSA til fjölda borga um allan heim og tugir erlendra flugfélaga hafa Prag á áætlunum sínum.

Prag er tengd járnbrautaneti Evrópu og aðalbrautarstöðin heitir Vitezného února.

Stöðugt er verið að lengja net neðanjarðarlesta í borginni.  Skurðarpunktur A-lestanna (austur-vestur) og C-lestanna (suður-norðvestur) er á Muzeumstöðinni.  Borgarlestirnar eru aðalsamgöngutækin og strætisvagnar aka í yztu úthverfi.

Prag hefur verið ein meginmiðstöð menningar Evrópu um aldir.  Fyrsti háskóli Mið-Evrópu, Karlsháskólinn, var stofnaður þar árið 1348.  Í borginni er fjöldi leikhúsa, tvö óperusvið, þrjár fílharmoníusveitir og mörg tónlistarhús.  A.m.k. 90 kirkjur og kapellur, fjöldi minnismerkja og gömul hús eru vernduð.  Starfrækt er vísindaakademía og fjöldi rannsóknarstofa auk listaskóla og sönglistarskóla.  Þar eru einnig mörg bókasöfn, 17 tæknisöfn og margar menningarstofnanir.  Stærstu bókasöfnin eru Þjóðarbókhlaðan, Borgarbókasafnið, bókasafn Þjóðminjasafnsins og Lækningabóksasafnið.

Prag er aðalviðskipta- og iðnaðarborg landsins.  Þar er Verzlunarráð ríkisins, bankar og viðskiptastofnanir.  U.þ.b. 10% framleiðslufyrirtækja landsins eru í borginni.  Vélaframleiðsla er mikilvægur iðnaður auk framleiðslu byggingarefna og viðarvinnslu.  Efnaiðnaður er talsverður og matvæla- og bjórframleiðsla einnig.  Vefnaðar-, fata- og skóiðnaður er talsverður.