Talið er, að slavneskir þjóðflokkar frá Visnulægðinni hafi setzt að á svæðum, sem nú heita Bæheimur, Moravía og Silesia.  Tékkar stofnuðu konungsríkið Bæheim, sem réði yfir Moravíu frá 10. til 16. aldar.  Einn kónganna, Karl IV, heilagur rómanskur keisari, gerði Prag að höfuðborg ríkisins og miðstöð latneskrar menningar.  Hússítahreyfingin, sem Jan Hus stofnaði (1369?-1419), tengdi slava siðbótinni og var vakning fyrir tékkneska þjóðernishyggju.  Habsborgarinn Ferdinand I tók við völdum 1526.  Tékkar gerðu uppreisn 1618 og ollu þannig upphafinu að 30 ára stríðinu.  Þeir biðu ósigur 1620 og urðu hluti af austurríska keisaradæminu næstu þrjár aldirnar.  Þeir komust ekki undan yfirráðum Habsborgara fyrr en að fyrri heimsstyrjöldinni lokinni, en þá hrundi austurrísk-ungverska keisaradæmið.  Lýst var yfir sameiningu tékkneskra og slóvakskra landsvæða í Prag 14. nóv. 1918.

Í marz 1939 hernámu Þjóðverjar Tékkóslóvakíu og Bæheimur og Moravía urðu þýzk verndarsvæði alla síðari heimsstyrjöldina.  Ríkisstjórn landsins kom aftur í apríl 1945 og hin gömlu landamæri ríkisins voru staðfest.  Í kosningunum 1946 náðu kommúnistar meirihluta og árið 1948 komust þeir til valda.  Þá var landið gert að alþýðulýðveldi að sovézkri fyrirmynd.  Tæplega 42 ára stjórn kommúnista lauk, þegar Vaclav Havel, mikils metinn rithöfundur og stjórnarandstæðingur, var kjörinn forseti landsins 1989.  Endurvakningu lýðræðisins var tekið með fögnuði í núverandi Tékklandi, en í Slóvakíu fæddist öflug þjóðernisleg hreyfing, sem varð fullvaxta 1991með kröfunni um sjálfstæði Slóvakíu.  Niðurstöður kosninganna 1992 urðu til þess að Tékkóslóvakíu var skipt í tvö frjáls og fullvalda lýðveldi, Tékkland og Slóvakíu 1. jan. 1993.  Tékkland varð meðlimur í NATO í marz 1999.  Næstu markmið landsins er að efla alþjóðleg sambönd og verða aðili að Efnahagsbandalagi Evrópu.