Göreme-þjóðgarðurinn, álfabyggðir og neðanjarðarþorp Kappadónínu ættu að vera á dagskrá allra ferðamanna í Tyrklandi.  Þetta eru mjög sérstök og falleg landsvæði, sem hafa orðið svolítið útundan.  Það er ævintýralegt að skoð Kaymakli-þorpið undir yfirborðinu, höggvið í mjúkt móberg.  Þar dvöldu þorpsbúar, þegar óvinaherir sóttu að og lokuðu innganginum með stórri steinhurð, sem var rúllað fyrir.  Stokkur frá yfirborðinu þjónaði sem loftræsting, vatnslögn og leið aðfanga til þorpsbúa á meðan þeir dvöldu neðanjarðar.  Kæmust óvinir inn í þorpið, áttu íbúarnir kost á undankomu í annað neðanjarðarþorp við hliðina.  Þarna bjuggu stundum allt að 15.000 manns, þegar sótt var að þeim.

Þorpið er á 7 hæðum.  Þar eru m.a. gripahús og aðstaða til víngerðar.  Þegar þetta er ritað (2007) er búið að grafa 4 hæðir út og þrjár eru eftir.  Landslagið í þessu litla héraði í Litlu-Asíu, Tyrklandi, er vindsorfið móberg, sem varð til í eldgosum.  Þarna eru fjölbreyttar höggmyndir náttúrunnar, keilur, pýramýdar, súlur og stallar.

Kappadókía var fjölþjóðlegt svæði, því þangað sóttu Palestínumenn og aðrir athvarf á flótta undan Rómverjum, múslimum og mongólum.  Þarna var lagður grunnur að fyrsta kristna söfnuðinum í heiminum, þegar Páll postuli kom í heimsókn.  Á dögum Heródótusar, föður sagnfræðinnar (490-425 f.Kr.), bjuggu Kappadókar á svæðinu milli Tárusfjalla og Svartahafs.  Nafn svæðisins kom fyrst fram seint á 6. öld f.Kr., þegar það tilheyrði Persaveldi.  Eldgosin þrjú, sem mynduðu þetta svæði, eru kölluð Erciyes, Hasan og Melendiz Daðlari.

Göreme-þjóðgarðurinn er á heimsminjaskrá UNESCO.  Þar eru líka híbýli í klettum og álfabyggir út um allt.  Góðu álfarnir líkjast blómálfum á Íslandi, en hinir vondu draga fólk niður í græn smávötn á svæðinu og drekkja því.  Þarna voru reist munka- og nunnuklaustur, kirkjur og aðrar vistarverur allt frá frumkristni.  Þarna eignaðist rétttrúnaðarkirkjan hina heilögu þrenningu, guð föður, soninn og heilagan anda.  Ferðalagar una þarna gjarnan daglangt og skoða fagurskreyttar bergkirkjur.  Þær eru margar prýddar velvarðveittum veggmyndum, sem sólarljósið hefur ekki náð til, en síðari íbúar hafa eyðilagt að hluta með því að krafsa burt augu mannamynda.  Þau voru álitin hættuleg húsdýrum, sem voru geymd í þeim.

Heimild:  Grein Gunnars Hersveins í Mbl. 12. apríl 2007.