Reykjavík 7. apríl 2008.
Í dag birtist þessi frétt á heimasíðu Félags leiðsögumanna (takið eftir, að stjórn leiðréttir þessa frétt tvisvar hér að neðan):

Endurmenntun Háskóla Íslands (EHÍ) býður á næsta hausti upp á leiðsögunám á háskólastigi, og Hólaskóli hefur einnig áhuga á því að bjóða upp á slíkt nám.

Einnig er verið að undirbúa "stöðupróf" í samvinnu við IÐUNA.

Kjarasamningaviðræður eru enn í fullum gangi.

Samningur um merktan fatnað hja 66°N í höfn.

Endurmenntun Háskóla Íslands ætlar að bjóða upp á nám í leiðsögn nú á haustmisseri .
Það er mjög spennandi að sjá hvernig það kemur út, þetta verður þriggja anna nám sem gefur 30 einingar.
Félagið mun eiga fulltrúa í fagráði og fylgjast með því.
Námið verður sambærilegt við námið hjá Menntaskólanum í Kópavogi, byggt á sömu námsskrá.

Einnig hefur ferðamáladeild Háskólans á Hólum lýst áhuga sínum á að kanna með nám í leiðsögn sem væri eðlileg viðbót við það nám í ferðamálafræðum sem þar fer nú þegar fram.

IÐAN - fræðslusetur, vill koma á raunfærnimati fyrir starfandi leiðsögumenn með nægilega reynslu. Það er unnið í samvinnu við Menntaskólann í Kópavogi og Félag leiðsögumanna. Þeir sem færu í þetta mat og í ljós kæmi að eitthvað vantaði upp á færni þeirra ættu kost á að fara í MK og ljúka því sem á vantaði og fá þá skírteini sem faglærðir leiðsögumenn.

Kjarasamningaviðræður eru enn í fullum gangi og meðan svo er er von um að samningar náist. Betra en að missa samninga til sáttasemjara.

Samningur um afslátt af merktum rauðum fatnaði eru í höfn hjá 66° og geta þeir sem greitt hafa  árgjaldið til  félagsins og fengið skírteini fyrir árið 2008 farið í verslunina í Garðabæ og pantað sér úlpu eða peysu.

f.h. stjórnar PGV 6/4/08

Athugasemdir mínar:
EHÍ kemur ekki til með að fylgja námsskránni, sem MK notar í Leiðsöguskóla Íslands.  Kristín Jónsdóttir, forstöðumaður, sagði, að ný námsskrá yrði smíðuð og hún mundi veita 30 einingar.  EHÍ kemur ekki til með að taka nokkurt tillit til eða veita námi í MK nokkra viðurkenningu.  Þetta þýðir einfaldlega, að verið er að fela sífellt fleiri skólum menntun leiðsögumanna og byggja hana á jafnmörgum grunnum og þeir eru margir.

Forstöðumaður EHÍ er dóttir einhvers mætasta og reyndasta leiðsögumanns landsins, Kristínar Njarðvík.  Orð hennar í mín eyru um framboð leiðsögunáms í EHÍ gáfu til kynna, að menntun nemenda í MK yrði ekki metin sem sambærileg. Slíkt er þó undir hverri deild komið, því þær hafa eigið ákvörðunarvald í þeim efnum.

Anna Dóra Sæþórsdóttir, dósent í ferðamálafræði við land- og ferðamálafræðiskor HÍ, sagði mér í samtali í dag, að n.k. föstudag yrði fundað um þetta mál.  Því væri ekki útséð um, að leiðsögunámið yrði í EHÍ.  Hún sagðist mundu stinga upp á fundi með Margréti, skólastjóra MK, um möguleikann á flutningi Leiðsöguskóla Íslands til HÍ, svo ósamræmið í þessari fræðslu aukist ekki enn frekar.

EHÍ má setja upp nám og krefjast greiðslu kostnaðar af nemendum, en aðrar deildir og skorir HÍ ekki.  Þær eiga því óhægt um vik með fjölgun námsbrauta nema fjármagn fylgi.  Frumvarp til laga um HÍ hefur strandað á þessum þröskuldi í meðferð Alþingis og bíður þar enn þá.  Yrði Leiðsöguskóli Íslands fluttur til HÍ, fylgdi honum sjálfkrafa fjárstyrkur ríkisins, sem þyrfti að vera mun hærri, því skólagjöld hafa sífellt hækkað.

Sigríður Magnúsdóttir hjá Háskólanum á Hólum í Hjaltadal sagði mér í símtali í dag, að þar væri braut í gönguleiðsögu og ekki væri fyrirhuguð samkeppni við MK eða aðra skóla á sviði almennrar menntunar leiðsögumanna.

Sólveig, fagstjóri Leiðsöguskóla Íslands, sagði mér í símtali í dag, að ekkert samráð væri milli hennar og EHÍ eða annarra menntastofnana um flutning leiðsögunáms frá MK.  Hún sagði aftur á móti, að hin síðari ár hafi skólastjóri MK lýst vilja til að fá viðurkenningu leiðsögunámsins á háskólastigi. Í greinargerð námsskrárinnar er skólinn ekki skilgreindur sem framhaldsskóli, svo hann er nokkurn veginn í lausu lofti og skrefið ætti að vera stutt á háskólastigið.

Sólveig sagði, að frumkvæði að raunfærnimati, á mannamáli „stöðuprófi”, væri að öllu leyti Leiðsöguskólans, en ekki stjórnar F.l.  Hún sagði, að fólki bjóðist þessi möguleiki nú þegar i vor, þannig að allir, sem standast það, fá fulla viðurkenningu Leiðsöguskóla Íslands, en hinir fá skrá yfir vankanta, sem þeim býðst að sníða af í skólanum næsta haust.

Þessar staðreyndir segja mér, að stjórn Félags leiðsögumanna er annaðhvort vísvitandi að ljúga að okkur eða hefur ekki hugmynd um, hvað hún er að gera.  Formaður og varaformaður Félags leiðsögumanna leika þann ljóta leik eina ferðina enn að ausa bæði röngum og mjög takmörkuðum upplýsingum yfir okkur.  Það er búið að lítilsvirða okkur allt of oft með þögninni og svona framkomu og tími til kominn að linni.  Geti formenn okkar ekki komið öðruvísi fram við okkur, ættu þeir að sjá sóma sinn í því að segja af sér strax.  Við hljótum að geta fundið fólk, sem kann mannasiði, í staðinn.

Samkvæmt 13. gr. félagslaga ber stjórninni að vinna að viðurkenningu leiðsögunáms á háskólastigi og að það verði metið allt að 60 eininum fyrir árið 2011.

Sjá hér að neðan tvær leiðréttingar upprunalegrar fréttar án þess að nokkuð sé dregið til baka af fullyrðingum um Hólaskóla.  Iðan er aftur á móti dottin úr dæminu.  Þetta er sagan endalausa.

Þessar eru afleiðingar gerða þinna eða aðgerðarleysis, félagi góður.  Mundu það!

Eftirfarandi leiðrétting birtist síðdegis 7. apríl 2008:
7.4.2008. Endurmenntun Háskóla Íslands (EHÍ) býður á næsta hausti upp á leiðsögunám á háskólastigi, og Hólaskóli hefur einnig áhuga á því að bjóða upp á slíkt nám. Einnig er verið að undirbúa "stöðupróf" í samvinnu við IÐUNA. Kjarasamningaviðræður eru enn í fullum gangi. Samningur um merktan fatnað hjá 66°N eru í höfn.

Endurmenntun Háskóla Íslands ætlar að bjóða upp á nám í leiðsögn nú á haustmisseri.

Það er mjög spennandi að sjá hvernig það kemur út, þetta verður þriggja anna nám sem gefur 30 einingar.

Félagið mun eiga fulltrúa í fagráði og fylgjast með því.

Einnig hefur ferðamáladeild Háskólans á Hólum lýst áhuga sínum á að kanna með nám í leiðsögn sem væri eðlileg viðbót við það nám í ferðamálafræðum sem þar fer nú þegar fram.

IÐAN - fræðslusetur, vill koma á raunfærnimati fyrir starfandi leiðsögumenn með nægilega reynslu. Það er unnið í samvinnu við Leiðsöguskólann og Félag leiðsögumanna. Þeir sem færu í þetta mat og í ljós kæmi að eitthvað vantaði upp á færni þeirra ættu kost á að fara í Leiðsöguskólann og ljúka því sem á vantaði og fá þá skírteini sem faglærðir leiðsögumenn.

Kjarasamningaviðræður eru enn í fullum gangi og meðan svo er er von um að samningar náist. Betra en að missa samninga til sáttasemjara.

Samningur um afslátt af merktum rauðum fatnaði eru í höfn hjá 66° og geta þeir sem greitt hafa  árgjaldið til  félagsins og fengið skírteini fyrir árið 2008 farið í verslunina í Garðabæ og pantað sér úlpu eða peysu.

f.h. stjórnar PGV 6/4/08 (leiðrétt 7/4/08)

Þessi leiðrétting sást á síðu félagsins 8. apríl 2008:
7.4.2008. Endurmenntun Háskóla Íslands (EHÍ) býður á næsta hausti upp á leiðsögunám á háskólastigi, og Hólaskóli hefur einnig áhuga á því að bjóða upp á slíkt nám. Kjarasamningaviðræður eru enn í fullum gangi. Samningur um merktan fatnað hjá 66°N er í höfn.

Endurmenntun Háskóla Íslands ætlar að bjóða upp á nám í leiðsögn nú á haustmisseri.

Það er mjög spennandi að sjá hvernig það kemur út, þetta verður þriggja anna nám sem gefur 30 einingar.

Félagið mun eiga fulltrúa í fagráði og fylgjast með því.

Einnig hefur ferðamáladeild Háskólans á Hólum lýst áhuga sínum á að kanna með nám í leiðsögn sem væri eðlileg viðbót við það nám í ferðamálafræðum sem þar fer nú þegar fram.

Kjarasamningaviðræður eru enn í fullum gangi og meðan svo er er von um að samningar náist. Betra en að missa samninga til sáttasemjara.

Samningur um afslátt af merktum rauðum fatnaði eru í höfn hjá 66° og geta þeir sem greitt hafa  árgjaldið til  félagsins og fengið skírteini fyrir árið 2008 farið í verslunina í Garðabæ og pantað sér úlpu eða peysu.

f.h. stjórnar PGV 6/4/08 (leiðrétt 7/4/08, og leiðrétt aftur 8/4/08)