Félagsfundur F.l. 21. nóv. 2007.
Reykjavík, 16. nóvember 2007.  Þennan félagsfund um veruna í ASÍ, þ.e.a.s. allsherjaratkvæðagreiðslu eða ekki um hana, átti halda fyrir 7. maí sl.  Stjórn félagsins er orðin fræg að endemum fyrir að sniðganga lög félagsins okkar og verður lengi i minnum höfð fyrir siðleysi, ókurteisi og almennan skort á kunnáttu í mannlegum samskiptum, sem á þó að prýða hvern leiðsögumann.

Stjórn F.l. býður fulltrúum ASÍ og BHM til fundarins samkvæmt fundarboði.  Við bjóðum þá vissulega velkomna til að greina frá sínum samtökum og kostum og göllum aðildar.  Við verðum síðan að fá næði til að afgreiða okkar mál án frekari afskipta þeirra.

Kynni framhaldsaðild að ASÍ að kosta:

1.   Að hver sem er, án sérnáms, geti orðið félagi (trésmiðir, verkafólk, o.fl.)?
2.   Að laun okkar verði áfram lág?
3.   Að við munum búa við áframhaldandi réttindaleysi?
4.   Að ókleift verði að fá viðurkenningu starfsheitis?
5.   Að mun erfiðara verði að fá viðurkenningu náms á háskólastigi?
6.   Að stjórnir félagsins haldi áfram að nota ASÍ sem hækju og letitæki?
7.   Að landsfélag okkar verði áfram viljalaust verkfæri ASÍ?
8.   Að vinnuveitendur ráði æ fleiri ófaglærða leiðsögumenn til vinnu, því stéttarfélag styður ekki faglærða fram yfir ófaglærða, þótt samningar kveði svo á?
9.   Að æ fleiri faglærðir leiðsögumenn verði atvinnulausir, því ófaglærðir eru á lægri launum og undirbjóða?
10. Að gæðum hraki enn frekar í ferðaþjónustunni fyrir bragðið?
11. Að við getum ekki framleiðis fremur en endranær búizt við stuðningi frá ASÍ?
12. Að búast megi við flótta faglærðs fólks úr félaginu, að það hætti vegna lágra launa og skeytingarleysis stjórna F.l.?
13. Að við séum að greiða háar fjárhæðir árlega til ASÍ til einskis?
14. Að faglærðir leiðsögumenn fá ekki að ráða eigin málum?

Núverandi og tvær fyrrverandi stjórnir félagsins hafa haldið því fram, að ASÍ hafi verið haukur í horni í mörgum málum, en aldrei gefið okkur neinar skýrslur um slík tilfelli.  Það er því varasamt að leggja trúnað á þessar fullyrðingar.  Eina tilfellið, sem við höfum orðið áþreifanlega vör við návist ASÍ, var á aðalfundinum 2007, þegar ég varð að draga tillögur mínar um lagabreytingar til baka.  Þær stönguðust í veigamiklum atriðum á lög ASÍ, sem við verðum að beygja okkur undir og getum ekki verndað félag okkar fyrir aðsókn þeirra, sem vilja vera í okkar röðum án tilskilins náms.  Einnig er staðfestur grunur um úrtölur og áhugaleysi ASÍ fyrir kjarabaráttu okkar.

Til hvers er stéttar- og fagfélag, ef það getur ekki haldið utan um félaga sína og verndað hagsmuni þeirra á þeirra eigin forsendum?  Eigum við að láta sem ekkert sé og leyfa örfáum einstaklingum, sem skildu og skilja ekki tilgang Félags leiðsögumanna, að ráða?  Vita félagar F.l. ekki, að eina ástæða ASÍ-aðildar var að fá vinnuveitendur að samningaborðinu, þegar annað dugði ekki á bernskuárum félagsins?

Reykjavík, 19. nóvember 2007.
Skúli Möller, formaður kjaranefndar Félags leiðsögumanna, lýsir kostum ASÍ-aðildar í fréttabréfi félagsins í dag.  Hann er einn margra, sem þekkja ekki sögu félagsins nógu vel til að flíka fullyrðingum um upprunalega ASÍ-aðild okkar.

Orð hans í þessum lofgerðarpistli um ASÍ skjóta skökku við raunverulega reynslu okkar af þessum heildarsamtökum og skilaboð hans sjálfs til mín í tölvupósti hinn 30. október síðastliðinn eru af allt öðrum meiði:
 

----- Original Message -----

From: Fridrik Haraldsson

To: skulimoller@simnet.is

Sent: Sunday, October 28, 2007 3:25 PM

Subject: Komandi kjarasamningar.

Heill og sæll,
Formaðurinn okkar hringdi til mín miðvikudaginn 17. þ.m. kl. 18:00.  Hún spurði mig, hvort mér yrði sárt um að ASÍ-fundinum yrði frestað þar til næstu samningar lægju fyrir.  Ég svaraði því til, að mér væri orðið ósárt um flest, sem snertir þetta félagsræksni okkar.  Ég bað hana senda mér tölvupóst með þessari beiðni, svo hún gæti þá allavega vísað í einhverja staðfestingu frá mér, ef ég sæi ástæðu til að láta hana og stjórn félagsins komast upp með að brjóta á okkur félagslög áfram.  Hún hefur ekki séð ástæðu til að virða mig þess viðlits.
Nú veit ég ekki hver staða þín og kjaranefndar okkar er í samningum við vinnuveitendur.  Ég tel mig vita af fyrri reynslu, að við höfum ekkert til ASÍ að sækja í sambandi við samninga okkar - ekki fyrr - ekki núna - ekki í framtíðinni.  Ég tel mig líka vita, að hægur vandi er að hafa alla fyrirvara á öllum samningsatriðum heildarsamtaka atvinnulífsins, þannig að við verðum ekki utangarðs í neinum efnum.  Þetta byggist alfarið á því, að kjaranefnd okkar sé með góðri meðvitund.  Ég sé enga ástæðu til að ætla annað, þar sem þú stendur í stafni.
Að svo mæltu ætti framhaldið hjá mér að vera krafa um þennan fund.  Mig langar samt til að heyra örlítið frá þér áður, ef mér yfirsést eitthvað í þessu mati mínu.
Beztu kveðjur,
Friðrik Haraldsson

Ég skil pistil Skúla svo, að hann mæli fyrir hönd kjaranefndar með framhaldi aðildar að ASÍ.  Ég skil ekki tvískinnunginn í afstöðu hans síðan hann sendi mér tölvupóstinn.  Hann mun vafalítið skýra þessi nýju viðhorf fyrir okkur á fundinum.

Þau breyta engu um staðreyndirnar.  ASÍ hefur aldrei séð ástæðu til að styðja okkur í neinu, sem máli skiptir.  Það þarf enga talnaleiki til að sýna, hvað við höfum grætt eða sparað með aðild.  Það þarf aðeins fólk með bein í nefinu til að standa sig í störfum, sem það hefur tekið að sér fyrir okkur!

Það er erfitt að trúa því, að Skúli vilji ýta undir viðvarandi ómennsku, sem hefur birzt í leti núverandi formanns og nokkurra stjórnarmanna, svo ekki sé talað um stjórn Ástu Ólu, sem kom okkur í þetta klúður.  Núna reynir á skammtímaminnið.  Ragnheiður var varaformaður, sem tók við, þegar Ásta sagði af sér að tillögu Borgþórs Kjærnesteds.

Segjum nú svo, að Skúli hafi eitthvað til síns máls.  Vakna þá ekki spuringar um aðra þætti, sem hann minnist ekki á?  Þætti, sem eru tíundaðir í pistli mínum hér að ofan, frá 16. nóvember?