Reykjavík 5. maí 2006.
Félagið okkar - Nútíð / Framtíð!
Til þess að vega og meta stöðu Félags leiðsögumanna núna, þurfum við að líta um öxl.  Hvað hefur mistekizt og komið okkur í ógöngur?  Hvað er hægt að gera til að brjótast upp úr feninu?

Það er tímasóun að ræða aðdraganda núverandi ástands.  Hann ætti að vera okkur víti til varnaðar og hvatning til dáða.  Það er ekki réttmætt að kenna einstökum stjórnum félagsins um áföllin, því þær hafa ævinlega fengið nægan styrk frá félagsmönnum til að breyta stefnunni.  Niðurstaðan er því sú, að núverandi ástand er okkur öllum að kenna, annaðhvort vegna beinna afskipta eða afskiptaleysis.

Vafalaust eru til margar leiðir að markinu, sem félagið stefndi að frá upphafi, þ.e. að tryggja réttindi okkar og mannsæmandi laun.  Til þess, að slíkt megi takast, verða allir, sem að málinu koma, að sýna metnað og vilja.

Það er búið að þrautreyna ýmsar leiðir án árangurs, þannig að við verðum að troða nýjar brautir.  Ein þeirra er að skoða tilhögun almenns leiðsögunáms og fá það flutt frá Menntaskólanum í Kópavogi til einhvers háskóla.  Þessi hugmynd hefur þegar fengið byr hjá ferðamálaskor jarðfræðideildar H.Í. og BHM og fjöldi félagsmanna hefur lýst stuðningi við hana.

Þessi breyting, ein og sér, leiðir sjálfkrafa til viðurkenningar starfsheitis og starfs leiðsögumanna og stórbætir aðstöðu til viðunandi kjarasamninga.  Hún hefur það í för með sér, að félagið verður að losa sig úr viðjum ASÍ, því þar á ekkert fagfélag á háskólastigi heima.  Það gæti komið sér fyrir í heildarsamtökum eins og BHM eða jafnvel staðið sjálfstætt á eigin forsendum.

Stéttarfélög þurfa nú að laga sig að gjörbreyttu umhverfi á vinnumarkaði vegna laganna um frjálsa för vinnuafls innan ESB.  Þau voru þegar búin að fá forsmekkinn að þessari breytingu og þriggja ára frest til aðlögunar.  Flest þeirra hafa viðurkennt, að þessi frestur hafi ekki verið vel nýttur.

Félag leiðsögumanna var og er fagfélag í hugum langflestra félagsmanna, þrátt fyrir breytingarnar, sem voru gerðar á lögum þess á aðalfundinum 2005.  Félagið var stofnað sem metnaðarfullt fagfélag.  Markmið þess var og er að keppa að aukinni menntun og kröfum til félaga sinna og vinna markvisst að viðurkenningu út á við.  Menntuninni fór stöðugt fram og félagið naut virðingar innan ferðaþjónustunnar.  Núverandi staða menntunar leiðsögumanna í Leiðsöguskóla Íslands er góð og ekki þörf á að gagnrýna hana nema í hófi, en hún verður að njóta sannmælis sem akademísk menntun.

Félag leiðsögumanna getur siglt sléttan sjó út úr núverandi vandræðum og tryggt sig gegn frjálsri för vinnuafls innan ESB á framangreindan hátt.  Við getum stuðlað að viðreisn félagsins með þátttöku í félagsstarfinu.  Samtakamáttur okkar er mikill, ef við hættum að hugsa neikvætt til félagsins vegna núverandi ástands og leggjum okkur fram við að breyta því.  Þau okkar, sem hafa þegar afskrifað félagið, ættu að endurskoða hug sinn og leggjast á árar með þeim, sem vilja auka veg félagsins á ný.

Mistakist þessi tilraun á næsta aðalfundi (2007), verður ekki annað séð, en nýtt félag verði stofnað – Fagfélag leiðsögumanna – og það vinni á svipuðum nótum og hér er lýst.  Það hefur í för með sér talsvert erfiðan róður, en ótvírætt árangursríkan, því nýtt félag yrði ekki eingöngu að berjast fyrir akademískri viðurkenningu, heldur einnig að sækja sjóði sína til gamla félagsins fyrir dómstólum.  Viðurkenning samningsréttar nýs félags yrði ekki endilega ofarlega á blaði, því það gæti samþykkt viðmiðunartaxta, sem enginn félagsmanna starfaði undir.