Gabon er sjálfstætt lýðveldi á miðbaug á vesturströnd Afríku, 267.667 km² að flatarmáli.  Norðan þess eru Miðbaugsgínea og Kamerún, Kongó í austri og suðri og Atlantshafið í vestri.  Fyrir ströndinni er eyríkið Sao Tomé og principe.  Frakkar réðu því sem nýlendu, þannig að landsmenn eru enn þá bundnir Frökkum, menningu þeirra og máli, sterkum böndum. Höfuðborg landsins er Libreville.  Aðrar helztu borgir landsins eru Port-Gentil, Lambaréné, Moanda, Mouila, Qyem, Franceville og Bitam.  Í þessum borgum búa u.þ.b. 40% íbúanna, en hinir búa vítt og breitt í u.þ.b. 4000 þorpum við helztu ár og þjóðvegi.  Víða í þessum þorpum búa aðeins fáeinar fjölskyldur.  Port-Gentil er miðstöð timbur- og olíuiðnaðar og Libreville er viðskipta- og stjórnsýslumiðstöð.