Mjó strandsléttan (víða 32 km breið syðst) er aðallega árframburður.  Hún breikkar til norðurs í allt að 165 km og þar ber líka á kalki og sandsteini.  Norðan vestasta hluta landsins, Lopez-höfða, er ströndin vogskornari.  Benguela-straumurinn, sem liggur til norðurs og myndar sandrifin á sunnanverðri ströndinni, hefur ekki sömu áhrif norðan höfðans.  Inni í landinu eru granítsléttur, sem teygjast aðallega til suðausturs og hækka úr 300 m í 600 m yfir sjó.  Vestar og norðar eru Kristalfjöll, sem árnar hafa grafið í sundur og skilið frá vesturhluta sléttunnar.  Í suðri rennur Ogooué-áin um sandsteinssöðul áður en hún rennur um láglendið að granítmyndunum Ogooué, sem rísa upp í u.þ.b. 960 m hæð (hæsti tindur er Iboundji, 980 m).

Þarna ríkir hitabeltisloftslag árið um kring og loftraki er mikill.  Úrkoman er mismunandi, allt frá 3050 mm í Libreville til 3810 á norðvesturströndinni.  Mesta úrkoman er á tímabilinu október til maí.  Frá júní til september er lítil sem engin rigning en loftrakinn er samt mikill.  Árstíðasveiflur hita eru sáralitlar og daglegur meðalhiti er í kringum 27°C. Hitabeltisskógur þekur u.þ.b. 75% landsins.  Þar er að finna rúmlega 3000 tegundir plantna, þ.m.t. Okoume-harðviðartré, sem eru aðalundirstaða iðnaðar í landinu.  Meðal dýrategunda í skóginum eru antilópur, apar, górillur, fjöldi fuglategunda og nokkur afbrigði af fílum.