Á 19. öld var þessi fyrrum nýlenda Spánverja þekkt sem land hinna einmana hestamanna (gauchos) á Pampashásléttunum og búgarðseigenda, sem lifðu eins og furstar á landareignum á stærð við lítil þjóðlönd.  Síðla á sömu öld og fyrstu þrjá áratugi hinnar 20. varð Argentína að draumalandi fátækra Evrópumanna, sem sáu tækifæri til að sjá sér og sínum betur farborða inni í landinu eða í stækkandi borgunum við hafið.  Milljónir innflytjenda streymdu til Argentínu á þessu tímabili.  Þeir fluttu með sér þekkingu og tækni, sem gerðu landið fljótlega að mesta iðnaðar- og landbúnaðarsvæði Latnesku Ameríku.

Argentínumenn hafa ítrekað orðið að lúta stjórn harðstjóra, oft með íhlutun hersins.  Annaðhvort var þessum harðstjórum vikið í byltingum eða þeir sátu þar til þeir dóu á náttúrulegan hátt.  Á lýðveldistímanum hefur landinu verið stjórnað sem sjálfstæðu fylkjasamband, þar sem hvert þeirra hefur lýðræðislega stjórn. 

Síðla á 20. öldinni leið þjóðin fyrir rangar ákvarðanir ríkisstjórnarinnar og varð fyrir miklum sálrænum og fjárhagslegum áföllum, s.s. í Falklandseyjastríðinu 1982.  Þar að auki hafa margar efnahagsaðgerðir ríkisstjórna landsins kynt undir óðaverðbólgu.  Batavonir og úrræði í efnahagslífi landsmanna liggja aðallega í gífurlegum náttúruauðæfum og velmenntuðum mannauði.