Nafnið er komið úr indíánamáli, ken-tah-the, sem þýðir Land morgundagsins, og það er oft nefnt Blágrasfylkið (Bluegrass State).  Flatarmál þess er 104.578 km², sem gerir það að 37 stærsta fylki BNA.  Það varð 15. fylki BNA árið 1792.  Íbúafjöldinn 1997 var u.þ.b.3,7 milljónir (7% negrar). Höfuðborgin er Frankfort og aðrar borgir m.a. Louisville, Lexington, Covington, Owensboro og Fort Knox.
Landbúnaður:  Tóbak, maís, hveiti, hesta-, svína- og nautgriparækt.
Jarðefni:  Kol, jarðgas, jarðolía og fosfór.
Iðanður:  Timbur, tóbak, matvæli, vélar, alúmíníum og samgöngutæki.
Ferðaþjónustan er mikilvæg.

Landið skiptist aðallega í þrjár landfræðilegar einingar, Flóaströndina í vestri, lága sléttu í miðju fylkinu frá norðri til suðurs og Appalachia-sléttuna í austri (Cumberland).  Vestur-Kentucky myndar hluta Flóasléttunnar.  Þessi hluti fylkisins er einnig nefndur Jackson-samningurinn, því Andrew Jackson, þá hershöfðingi og síðar forseti BNA, var fulltrúi alríkisstjórnarinnar í kaupsamningum við Chickasaw-indíánana um þetta landsvæði árið 1818.  Einkennandi fyrir það eru lágar hæðir og breiðir dalir.  Árframburðurinn og setlög gera það að einhverju bezta ræktarlandi fylkisins.