Qatar er sjálfstætt ríki í Miðausturlöndum.  Það er eitt Persaflóaríkjanna og er á Qatar-skaganum á austurhluta Arabaskagans.  Sunnan landsins er Sádi-Arabía og Sameinuðu furstadæmin.  Þessi landamæri eru óglögg en áætlað heildarflatarmál landsins er 4416 km².  Höfuðborgin er Doha.  Qater-skaginn er flatlendur og liggur hæst á klaksléttu í vesturhlutanum (40m). Suðurhlutinn er sendinn en aðrir landshlutar eru gróðurlausir nema allra nyrzt.

Loftslagið er mjög heitt og þurrt, 16,7°C í janúar og 36,7°C í júlí.  Talsverður loftraki er á sumrin (maí-október), en meðalúrkoman er oftast minni en 127 mm á ári.  Einu náttúruauðæfin eru olía og gas.  North Dome-svæðið er stærsta þekkta gassvæði jarðar, sem er ekki tengt olíusvæðum.