Västerås er höfuðborg lénsins Västmanland vestan Stokkhólms við mynni Svartár við Mälervatn í miðausturhlutanum.  Þar er stærsta innhöfn landsins og miðstöð rafiðnaðar.  Borgin hét áður Árós og síðar Vestri –Árós og var þá markaðsborg og biskupsetur í upphafi miðalda.  Á miðöldum var hún líka mikilvægur útflutningsstaður fyrir járn og kopar frá Bergslagennámusvæðinu.

Þjóðþing voru haldin þar nokkrum sinnum, þ.m.t. siðbótarþingið 1527 og 1544, þegar Vasaættinni var tryggð erfðafesta konungsdæmisins.  Í gotnesku dómkirkjunni liggja jarðneskar leifar Eiríks XIV.  Kastali frá 12. öld stendur við Svartá.  Þar er nú safn.  Áætlaður íbúafjöldi árið 1992 var 120 þúsund.