Aðalfundurinn 30. janúar 2007.        Ég fór heim af aðalfundinum í kvöld með skottið á milli lappanna, því allt, sem ég var búinn að leggja mikla vinnu í, var lagt þar í rúst á mettíma. Hvorki stjórn félagsins né ASÍ eru á hátt skrifuð í huga mínum. Ég veit ekki fyrir hverja stjórnir FL og „fagdeildar" hafa verið og eru að vinna - ekki fyrir okkur, þótt formaður okkar segði, að hún og stjórnin væru búin að leggja mikið á sig fyrir okkur.  Það er óhætt að segja að vindhöggin og lygavefurinn séu þreytandi!

Hér með er auglýst eftir frumkvöðli/frumkvöðlum, sem hafa döngun til að stofna Fagfélag leiðsögumanna, sem yrði algjörlega sjálfstætt í rekstri og óbundið regnhlífarsamtökum. Bezt væri, að allir félagar í fagdeild Fl létu verða af því, að skrá sig í nýja félagið og taka sjóð hennar með sér. Það yrði léttara fjárhagslega fyrir alla. Félagið yrði strax að gefa út viðmiðunartaxta.

Í upphafi yrði það að deila sjúkra-, endurmenntunar-, og lífeyrissjóði með Félagi leiðsögumanna, hvað sem síðar verður.

Félaga þess greiddu, eins og nú, fast félagsgjald og 1% af launum til félagsins.

Fagfélag leiðsögumanna er þegar skráð hjá ríkisskattstjóra og hefur fengið kennitölu, þannig að það bíður eftir nýrri stjórn og félögum.

Þar sem flest sund eru lokuð meirihluta félaga Fl til að iðka sjálfstæð vinnubrögð vegna spennitreyju ASÍ og moðstjórna „stéttarfélagsins" og læstu skúffunnar í því, svonefndrar fagdeildar, virðist vænsta leiðin að koma sér í burtu frá ASÍ á eigin forsendum. Við erum nefnilega enn þá í gíslingu.

Vilji einhverjir áhugasamir taka króann að sér, þarf ekki annað en að hafa samband við undirritaðan, sem hyggst ekki koma nálægt neinu félagsstarfi tengdu leiðsögumönnum aftur.

Beztu kveðjur,

Friðrik Haraldsson.

P.S. Nýskipuð merkisnefnd Fl þarf ekki að leggja mikið á sig vegna gæðamerkisins okkar, því það er skráð eign Fagfélags leiðsögumanna sem gæðamerki. Það þýðir einfaldlega, að einungis fagmenntaðir leiðsögumenn mega nota það.

31. janúar 2007.  Ég las spjallsíðu FL og bloggsíðu Péturs Gauta í kvöld.  Eftir þennan lestur skil ég betur, hvers vegna stöðugt er verið að leggja drög að uppfinningu hjólsins í Félagi leiðsögumanna og mikið sé að gera.

5. febrúar 2007.  Mér finnst ástæða til að benda faglærðum leiðsögumönnum á 17. gr. laga ASÍ (sjá tengil í vinstri dálki), þar sem úrsögn úr ASÍ er skilyrt.  Þá ber að hafa í huga 24. grein félagslaga Fl, sem segir að 20 félagar (fullgildir) geti krafizt félagsfundar, sem verður að boða innan tveggja vikna frá því að beiðni berst stjórn félagsins.  Fundarboðið verður að tilkynna tilefni fundarins, s.s. tillögu um úrsögn úr ASÍ.  Þessa tillögu þarf félagsfundurinn aðeins að samþykkja með einföldum meirihluta.  Félagsfundurinn þarf einnig að tilgreina hvenær stjórn félagsins skuli efna til allsherjaratkvæðagreiðslu um úrsögnina, því þess er ekki getið í lögum ASÍ.  Félagsfundurinn verður einnig að tilgreina frest stjórnar til að senda úrsagnarbréf til ASÍ að allsherjaratkvæðagreiðslu lokinni, verði hún samþykkt.   Úrsögnina verður að samþykkja með 2/3 hluta atkvæða fullgildra félaga í allsherjaratvkæðagreiðslunni til að hún verði gild og stjórn Fl. verði að framfylgja henni.