Miðafríkulýðveldið er landlukt ríki í miðri Afríku, 622.436 km² að flatarmáli.  Norðan landamæranna er Chad, Súdan í norðri og austri, Kongó (Kinshasa) og Kongó (Brazzaville) í suðri og Kamerún í vestri.  Höfuðborgin Bangui er á suðurlandamærunum við Ubangi, þverá Kongófljótsins.  Þetta stóra land er að mestu stór og öldótt slétta í 610-760 metra hæð yfir sjó, sem myndar vatnaskil milli Chad-vatns og Kongófljótsins.  Þverár Chari-árinnar liðast um nyrzta þriðjung landsins.  Vatnið frá hinum tveimur rennur í suðurátt til Ubangi-árinnar, sem myndar suðurlandamæri landsins við Kongó (Kinshasa).

Sléttan mikla hækkar smám saman til norðausturs að Bongosfjöllum, sem rísa upp í 1400 m hæð yfir sjó á Toussoro-fjalli, og í áttina að Tondoufjöllum í austri.

Yadefjöllin gnæfa yfir sléttunni norðvestanverðri og þar er Ngaouifjall hæst (1500m).  Í vesturátt ber hæst Karrefjöll (1200m), sem eru úr graníti og hallast niður að sandsteinssléttu til austurs.  Í norðurátt ber mest á Dar Challafjöllum, sem rísa hæst á Tingafjalli í 1348 m á landamærunum að Súdan.  Suðausturhluti sléttunnar er sundur skorin af árfarvegum.