Vermont er eitt Nýja-Englandsfylkja BNA með kanadíska héraðið Quebec í norðri, New Hamshire í austri, Massachusetts í suðri og New York í vestri.  Vesturbakki Connecticut-árinnar myndar austurmörkin og hluti vesturmarkanna liggur um Champlain-vatn.

Heildarflatarmálið er 24.877 km² (43. stærsta fylkið).  Íbúafjöldi 1997 var u.þ.b. 512.000 (0,2% negrar). 

Vermont varð 14. fylki BNA 4. marz 1791 en hafði verið sjálfstætt lýðveldi fram að því.  Efnahagur þess byggðist aðallega á landbúnaði fram á 20. öldina, þegar iðnaðurinn varð mikilvægari.  Ferðaþjónusta og aðrar þjónustugreinar eru einnig mikilvægar tekjulindir og fylkið er þekkt fyrir hin mörgu skíðasvæði.  Chester A. Arthur og Calvin Coolidge, Bandaríkjaforsetar, voru fæddir í fylkinu.  Nafn þess er dregið af franska orðinu vert (grænn) og mont (fjall) og gælunafn þess er Grænafjallsfylkið.  Helztu borgir þess eru Montpelier (höfuðborgin), Burlington, Rutland, Essex og Bennington.