Lýðveldið Máritíus er í Mascarene-eyjaklasanum 800 km austan Madagaskar í Indlandshafi á 20°18’S og 57°36’E.  Eyjan er 61 km löng frá norðri til suðurs og 47 km frá austri til vesturs.  Yfirráðasvæði þess eru Rodrigues-eyjar, 553 km austar, Cargados-Carajos-rifin, 402 km norðaustar og Agalega-eyjar, 933 km norðar.  Höfuðborgin er Port Louis.  Heildarflatarmál landsins er 2040 km² og áætlaður íbúafjöldi 1997 var tæplega 1,2 miljónir.

Máritíus er eldfjallaeyja og næstum alveg umkringd kóralrifjum.  Norðurhlutinn er slétta, sem hækkar smám saman upp á miðja eyjuna úr 270-730 m.y.s.  Hásléttan er umkringd lágum fjöllum, sem kunna að vera leifar gígbrúna gamals eldfjalls.  Þau rísa hæst 826 m.y.s. í Petite Rivière-Noire-tindi í suðvestri.  Tvær aðalárnar, Suðaustur-Stórá (40 km) og Norðvestur-Stórá, eru beizlaðar til raforkuframleiðslu.  Vacoas-vatn geymir vatnsbirgðir þeirra.