Kanaríeyjar eru fyrir vesturströnd Afríku í Atlantshafi.  Þar eru sjö stórar eyjar og fjöldi annarra minni í jaðri hitabeltisins.  Eyjaklasinn skiptist í tvö spænsk héruð, Las Palmas með Gran Canaria, Fuerteventura og Lanzarote og Santa Cruz de Tenerife með Tenerife, La Palma, Gomera og Hierro.  Frumbyggjarnir, guanch, voru hávaxnir og hvítir á hörund.  Fyrst bjuggu þeir í hellum í klettum með ströndum fram og síðar í hringlaga byggðum.  Árið 1402 hófu íbúar Kastilíu landnám á eyjunum og eftir ítrekuð átök við frumbyggjana lauk þeim árið 1496 á Tenerife.  Fyrsta könnunarferð Kólumbusar hófst, þegar hann lagði úr höfn á Gomera.  Verzlun og viðskipti fóru að blómstra eftir að Spánverjar stofnuðu fríhafnir á eyjunum á 19. öld og hagstætt loftslagið laðaði til sín æ fleiri ferðamenn.