Lýðveldið Líbanon er langt og mjótt arabaríki við botn Miðjarðarhafsins.  Strönd landsins er u.þ.b. 217 km löng og meðalbreidd landsins er 48 km.  Norðan þess er Sýrland, og Ísrael í suðri.  Heildarflatarmál þess er 10.230 km².  Höfuðborgin og jafnframt hin stærsta er Beirút.  Tveir fjallgarðar liggja samsíða gegnum landið endilangt og láglendi með ströndum fram er víðast fremur mjótt.  Anti-Líbanon-fjöll eru í austurhlutanum meðfram landamærunum að Sýrlandi.  Milli fjallgarðanna er hinn frjósami Bekaa-dalur, sem liggur nokkuð hátt yfir sjó.  Hann fær vatn frá aðalmóðu landsins, Litani, sem rennur til suðurs og síðan beint til vesturs um djúpt gljúfur og hverfur í Miðjarðarhafið.  Miðjarðarhafsströndin nýtur hlýrra sumra og mildra og rakra vetra.  Á sumrin er heitt og þurrt í Bekaa-dalnum og veturnir eru svalir.  Vesturfjallgarðurinn tekur til sín mikinn raka á veturna.

Miðjarðarhafsströndin nýtur hlýrra sumra og mildra og rakra vetra.  Á sumrin er heitt og þurrt í Bekaa-dalnum og veturnir eru svalir.  Vesturfjallgarðurinn tekur til sín mikinn raka á veturna.  Flóra landsins er mismunandi eftir hæð yfir sjó og loftslagi.  Með ströndinni eru lundir appelsínu- og ólífutrjáa og þar rækta bændur líka banana, fíkjur, vínber og aðra ávexti.  Epli og karftöflur eru ræktaðar í undirhlíðum fjallanna.  Í Bekaa-dalnum er ræktað tóbak, grænmeti, baðmull, korn og múlber.  Uppi í fjöllum er jarðvegurinn víðast ófrjósamur og eyðing jarðvegs hefur valdið því, að náttúrulegur gróður er að mestu horfinn.  Sedrustrén, sem landið er frægt fyrir, vaxa eingöngu á vernduðum svæðum.
.