London áhugaverðir staðir,
[Flag of the United Kingdom]


LONDON
ÁHUGAVERÐIR STAÐIR

.

.

Utanríkisrnt.

 

JARÐFRÆÐISAFNIÐ Geological Museum, er við Exhibition Road, South Kensington, SW7 2DE.  Brautarstöð:  South Kensington.  Opið mánudaga til laugardaga kl. 10:00-18:00 og sunnudaga kl. 14:30-18:00.  Aðgangur ókeypis.

Safnið leggur áherzlu á að sýna hin ýmsu efni, sem finnast í jörðu víðs vegar um heiminn, og að gefa útskýringar með kvikmyndum.

Í aðalsalnum er hnattlíkan (2m í þvermál), sem snýst.  Á fyrstu hæð er fjallað um sögu jarðar.  Eðalsteinasafnið er víðfrægt og steinunum er stillt út í upprunalegu formi og slípuðum.  Ein sýninganna, sem er ekki skipt um, er „Bretland fyrir búsetu manna”.  Auk hennar er sýnd jarðfræði mismunandi svæða landsins og viðskiptajarðfræði heimsins.  Þarna er einnig að finna steina frá tunglinu úr ferð Apollo.


KENSINGTON-HÖLL er í Kensington Palace Gardens, W8.  Brautarstöðvar:  Queensway, High Street Kensington.  Opin mánudaga til laugardaga kl. 09:00-17:00 og sunnudaga kl. 13:00-17:00.  Aðgangseyrir.

Kensington-höll, sem var einkaheimili ensku þjóðhöfðingjanna frá1689-1760, er nú opin almenningi að hluta til.  Mestur hluti hallarinnar er enn þá bústaður konungsfjölskyldunnar og há-aðalsins.

Vilhjálmur III keypti höllina og fól Sir Christopher Wren að breyta henni í konunglegan bústað.  Georg I hélt verkinu áfram með aðstoð William Kent og lauk því.  Síðasti konungurinn, sem hafði þar búsetu, var Georg II.  Viktoría drottning fæddist þar og fékk þar boðin um, að hún væri orðin drottning 18 ára.  María drottning fæddist þarna líka.  Vilhjálmur III, María II, kona hans, Anna og Georg II dóu öll í höllinni.

Eftirfarandi hlutar hallarinnar eru opnir almenningi:
Opinberu salirnir á annarri hæð (inngangur í norðausturhorni hallarinnar).  Þar eru málverk, einkum frá 17. og 18. öld.

Stigahúsið (Queen's Staircase), sem Sir Christopher Wren hannaði árið 1690.

Drottningarsalurinn.  Eikarklæddur salur með andlitsmyndum konunga.

Borð-, setu- og vinnustofur og svefnherbergi drottninganna Viktoríu, Maríu og Önnu.  Öll herbergin eru búin persónulegum húsmunum þeirra.

„Cupola-salurinn”, sem er prýddur loftmyndum og klukku frá 1730 (Musteri einræðisríkj-            anna fjögurra:  Assýríu, Persíu, Grikklands og Rómar).

Ýmsir salir og herbergi konunganna Vilhjálms III, Georgs I og Georgs II.

Sýningarsalur Vilhjálms konungs, sem Wren hannaði 1694, 32 m langur með áhugaverðum málverkum frá London á 18. og 19. öld, loftmálverki eftir Kent (Ævintýri Ódysseifs) og tréskurði eftir Grinling Gibbons.

Gróðurhúsið (Orangerie) frá 1704, sem var talið að Wren hefði hannað, en líklega er það verk Hawksmoor.

Fyrir framan suðurhlið hallarinnar er stytta af Vilhjálmi III, sem Vilhjálmur keisari gaf Játvarði VII.  Austan við höllina er minnismerki um Viktoríu drottningu.

Fólki er ráðlagt, að láta ekki hjá líða að ganga um garða hallarinnar, þegar það fer að skoða hana.  Karólína, drottning Georgs II, á heiðurinn af útliti þeirra (1728-31).  Á sunnudögum (í góðu veðri) eru haldnir tónleikar í garðinum, eins og öðrum konunglegum görðum.

Í Kensingtongarðinum er líka Albertsminnismerkið og Serpentine-listasafnið (samtíðarlist;  opið daglega 10:00-16:00).

KLEÓPÖTRUNÁLIN á Victoria Embankment.  Brautarstöð:  Embankment.  Þessi 13m hái og 180 tonna einsteinungur tengist Egyptalandi í heild en ekki sérstaklega Kleópötru.  Hann er úr rauðleytu graníti og gjöf frá egypzka varakonunginum Mohammed Ali.  Árið 1878 var hann fluttur sjóleiðina til Englands.  Skipið hreppti hið versta veður á leiðinni og sex hásetar týndu lífi.  Eftir að einsteinungnum hafði verið komið fyrir á Charing Cross á Victoria Embankment skírði fólk hana umsvifalaus 'Kleópötrunálina' og það nafn hefur haldizt síðan.

Óbeliskan er helmingur af pari (hin stendur í Central Park í New York), sem var höggvið úr klettum í Heliopolis í kringum 1500 f.Kr.  Hýróglífska letrið á henni rómar hetjudáðir og sigra Tútmósis III og Ramsesar mikla.

Mynd:  Kleópötrunálin við ána Thames.

*STRÍÐSMINJASAFN HEIMSVELDISINS.  „Imperial War Museum er við Lambeth Road, SE1.  Brautarstöðvar:  Lambeth North, Elephant og Castle.  Opið mánudaga til laugardaga kl. 10:00-17:50 og sunnudaga kl. 14:00-17:50.  Aðgangur ókeypis.

Þetta safn, sem er helgað sögu beggja heimsstyrjaldanna, var stofnað árið 1920 og komið fyrir í núverandi húsnæði í Geraldine Mary Harmsworth-garðinum árið 1936.

Í sjóhernaðardeildinni er þýzkur einsmannskafbátur, ítalskt tundurskeyti með þýzkri segul-sprengju, sem einn maður stýrði, líkön af herskipum og kafbátum og einkennisbúningar.

Í landhernaðardeildinni hljómar stöðugt söguleg frásögn:  „Leiðin til ófriðar”, sem nær yfir tímabilið frá 1870 til 1914, þegar fyrri heimsstyrjöldin brauzt út.  Þar gefur að líta sprengjuvörpur, skotvopn, fallbyssur og vélbyssur, brezka og indverska einkennisbúninga, herbúnað og búnað fallhlífahermanna.

Í flughersdeildinni er sýnd þróun herflugvéla frá árinu 1914.

A - B - C - D - E - F - G - H - J - K - L

 TIL BAKA     Ferðaheimur - Garðastræti 36 - 101 Reykjavik - info@nat.is - Heimildir            HEIM