BNA eru u.þ.b. 7,8 milljónir km² utan Hawaii (16.641 km²) og Alaska (1.526.881 km²).  Vegalengd milli austur- og vesturstrandar er u.þ.b. 6.000 km.  Landamæri BNA og Kanada eru 6.400 km löng og landamæri BNA og Mexíkó 3.200 km.  Strandlengjan er 18.000 km löng.  Í heild teygjast BNA allt frá heimsskautasvæðum (Alaska) til norðurmarka hitabeltisins (Florida).  Íbúafjöldinn var u.þ.b. 250 milljónir 1995.

Ekki eru allir sammála um hverjir séu elztu frumbyggjar Ameríku.  Fornminjar, sem fundust við Folsom í Nýju-Mexíkó árin 1925-28, bentu til búsetu manna þar mörgum þúsundum ára fyrr en áður var ætlað og kolageislamælingar hafa staðfest það.  Indíánarnir, sem Kólumbus nefndi svo, vegna þess, að hann hélt sig vera kominn til Indlands, munu, líkt og inúítar síðar, hafa komið frá Norður-Asíu fyrir 10-50 þúsund árum yfir landbrúna, þar sem Beringsund skilur meginlöndin að nú.
.